काठमाडौं। नेपाल मेडिकल कलेज शिक्षण अस्पताल आधिकारिक  ट्रेड युनियनले कलेजको शैक्षिक तथा अस्पताल सेवा संचालनको माग राखी अस्पताल प्रशासनमा ज्ञापन पत्र बुझाएको छ। नेपाल मेडिकल कलेज शिक्षण अस्पताल  आधिकारिक ट्रेड युनियनका अध्यक्ष किरण केसी सहितको टोलीले अस्पताल प्रशासनलाइ गम्भीर ध्यानाकर्षण गराउदै उक्त ज्ञापन पत्र बुझाएको हो।

उक्त ज्ञापन पत्रमा नेपाल मेडिकल कलेज प्रा लि प्रशासन बाट २०७८ साल बैशाख १५ गतेको सुचना अनुसार नेपाल मेडिकल कलेजमा कार्यरत कर्मचारीहरुलाई २०७८ बैशाख १६ गते बाटै (निषेधाज्ञाको दिन देखि) आफ्नै संचित बिदा वा बेतलबी बिदा बस्नुपर्ने भनि आधिकारिक ट्रेड युनियन संग कुनै छलफल नगरी सुचना प्रकाशित भएकोमा उक्त कार्यको नेपाल मेडिकल कलेज शिक्षण अस्पताल आधिकारिक कर्मचारी युनियनले घोर भत्सर्ना गरेको उल्लेख गरिएको छ।

साथै कोरोना महामारीको समयमा अग्र स्थानमा काम गर्ने कर्मचारीहरुलाइ पटक पटक धोका, भोक-भोकै राख्ने, अपहेलना गर्ने जस्तो अमानवीय कार्य तुरुन्त रोक्न अनुरोध गरिएको छ । त्यसको साथै यदि  कुनै कर्मचारीहरुलाई हाजिर गर्न बाट रोक्ने र जागी खाइ दिने धम्कि दिएमा २४ घण्टा भित्र सम्पूर्ण प्रशासन सेवा बन्द गरि कर्मचारीहरुको हक हितको लागि जुनसुकै कदम चाल्न कर्मचारी युनियन बाध्य हुने समेत जानकारी गराएको छ ।