गोरखा । मनकामना केबलकार एनालगबाट डिजिटल प्रविधिमा लैजान लागिएको छ ।

२३ वर्षअघि मनकामना मन्दिर जानेहरूलाई लक्ष्य गरेर सेवा थालेको केबलकारको पुरानो प्रविधिले मर्मत खर्च बढेपछि नयाँ प्रविधिमार्फत प्रविधियुक्त बनाउन विभिन्न चरणमा स्तरोन्नति गर्न लागिएको मनकामना दर्शन प्रालिका नायब महाप्रबन्धक उज्ज्वल शेरचनले जानकारी दिए । केबलकार स्तरोन्नतिको काम तीन चरणमा हुने बताइएको छ ।

पहिलो चरणमा तत्काल अत्यावश्यक र मर्मत गर्न नसकिने पार्टपुर्जा फेरिनेछ । दोस्रो चरणमा नयाँ प्रविधिमैत्री बनाउन पूर्वाधार तयार तथा अन्य थप पार्टपुर्जा फेरिने शेरचनले बताए । ‘अन्तिम चरणमा हालको एनालग प्रविधिबाट डिजिटलमा स्तरोन्नति गरिनेछ,’ उनले भने । केबल लट्ठा फेर्ने, कम्युनिकेसन केबललाई सेट्रा केबल र डीसी ड्राइभलाई एसी ड्राइभमा रूपान्तरण गरी प्रविधियुक्त बनाइने कम्पनीले बिहीबार जारी गरेको विज्ञप्तिमा उल्लेख छ । नियमित मर्मतसम्भारका अतिरिक्त स्तरोन्नति गर्दा सेवा अवरुद्ध हुन सक्ने शेरचनले बताए ।कान्तिपुर बाट